(మార్కెట్ కబుర్లు, హైదరాబాద్):
మీకు పదేళ్లలోపు కూతురు ఉందా? ఉన్నత చదువులు, పెళ్లి కోసం ఇప్పటి నుంచే ఇన్వెస్ట్ చేయాలనుకుంటున్నారా? మరి ఎలాంటి పెట్టుబడి మార్గాల్లో డబ్బులు పెట్టాలి? ఎందులో ఎక్కువ రిటర్న్స్ ఉంటాయి? కూతురు పెళ్లి వయసు వచ్చే నాటికి ఒకేసారి రూ. 84 లక్షలు రావాలంటే ఏం చేయాలి? అనేది ఇప్పుడు మనం తెలుసుకునే ప్రయత్నం చేద్దాం.
తమ పిల్లలకు నాణ్యమైన విద్య అందించాలని తల్లిదండ్రులు కోరుకుంటారు. ఆడపిల్లల తల్లిదండ్రులు అయితే అమ్మాయి పెళ్లి కోసం పొదుపు చేస్తూ ఉంటారు. ఎందుకంటే ప్రస్తుత రోజుల్లో ఉన్నత చదువులు, పెళ్లి కోసం పెద్ద మొత్తంలో ఖర్చు చేయాల్సి వస్తోంది. మంచి కాలేజీలో చదివించాలంటే లక్షల రూపాయలు అవసరమవుతున్నాయి. విద్యా ద్రవ్యోల్బణం ఏటా పెరుగుతూనే ఉంది. అందుకే భవిష్యత్తు ఖర్చులను తీర్చే విధంగా అధిక రాబడి వచ్చేలా ప్రణాళికలు ఉండాలి. అలాంటి పెట్టుబడి మార్గాల్లో డబ్బులు ఇన్వెస్ట్ చేసినప్పుడే అనుకున్న లక్ష్యాన్ని చేరుకోవచ్చు.
అవి ఏమిటో తెలుసుకుందాం..
ప్రస్తుతం పెట్టుబడి పెట్టేందుకు ఎన్నో రకాల అవకాశాలు ఉన్నాయి. అమ్మాయి పేరుపై పెట్టుబడి పెటేందుకు కేంద్రం సుకన్య సమృద్ధి యోజన అందిస్తోంది. ఇందులో 8.2 శాతం వార్షిక వడ్డీ కల్పిస్తోంది. అయితే, ఇందులో ద్రవ్యోల్బణాన్ని మించి రాబడి ఉండకపోవచ్చు. అయినప్పటికీ తాము పెట్టుబడి బడి పెట్టాలనుకుంటున్న సొమ్ము నుంచి కొంత భాగాన్ని సుకన్య సమృద్ధి యోజన పథకానికి కేటాయించాలని ఆర్థిక నిపుణులు సూచిస్తున్నారు. మిగిలిన సొమ్మును డైవర్సిఫైడ్ ఈక్విటీ మ్యూచువల్ ఫండ్లలో పెట్టుబడి పెట్టాలంటున్నారు. అంటే సుకన్య సమృద్ధి యోజన అకౌంట్ తీసుకుని అందులో పాప పేరుపై కొద్ది కొద్దిగా ఇన్వెస్ట్ చేస్తూనే ఈక్విటీ ఫండ్లలోనూ ఇన్వెస్ట్ చేయడం ద్వారా అనుకున్న లక్ష్యాన్ని చేరుకోవచ్చంటున్నారు.
ఉదాహరణకు ఇలా..
ఒక ఉదాహరణ ద్వారా అర్థం చేసుకుందాం. మీరు నెలకు రూ.30 వేలు ఇన్వెస్ట్ చేద్దాం అనుకుంటున్నారు అనుకుందాం. అందులో రూ.5 వేలు సుకన్య సమృద్ధి యోజనకు కేటాయించి, మిగిలిన రూ.25 వేలను డైవర్సిఫైడ్ ఈక్విటీ మ్యూచువల్ ఫండ్లకు కేటాయించాలి. ప్రస్తుతం చాలా మ్యూచువల్ ఫండ్స్ సగటున 12 శాతం రాబడి అందిస్తున్నాయి. కొన్ని ఫండ్స్ 15–18 శాతం వరకు సైతం రాబడులు ఇస్తున్నాయి. అయితే, అది అన్ని సార్లు సాధ్యం కాకపోవచ్చు. మీరు నెలకు రూ.25 వేల చొప్పున 13 ఏళ్ల పాటు డైవర్సిఫైడ్ ఈక్విటీల్లో ఇన్వెస్ట్ చేస్తున్నారు అనుకుందాం. సగటున 12 శాతం వార్షిక రాబడి వస్తుందని అంచనా వేస్తే పాప వయసు 23 ఏళ్ల వచ్చే నాటికి మీ కార్పస్ రూ.84 లక్షలకుపైగా అవుతుంది. మీరు ఎంచుకున్న ఫండ్ మంచి పని తీరు కనబరిస్తే ఈ నగదు మరింత పెరగనూ వచ్చు. లేదా తగ్గవచ్చు. మరోవైపు.. మీ అమ్మాయి భవిష్యత్తు అవసరాలకు ఆర్థిక రక్షణ కల్పించాలని, అందుకు తల్లిదండ్రులు టర్మ్ పాలసీ తీసుకోవాలంటున్నారు నిపుణులు.
