స్మాల్ క్యాప్ కేటగిరి, ఎఫ్ఎంసీజీ సెక్టార్ చెందిన ప్రముఖ కంపెనీ ఎలైట్ కాన్ ఇంటర్నేషనల్ లిమిటెడ్ ( Elitecon International Limited ) తమ షేర్ హోల్డర్లను తక్కువ సమయంలోనే మల్టీ మిలియనీర్లను చేసింది. అలాగే ఇటీవల ఈ కంపెనీ బోర్డు ఆఫ్ డైరెక్టర్లు స్టాక్ స్ప్లిట్ కి ఆమోదం తెలుపారు. దీంతో 1 షేరు కలిగి ఉన్న వారికి 10 షేర్లు రానున్నాయి. అంతే కాదు గత ఏడాది కాలంలో ఈ కంపెనీ షేరు ఏకంగా 4381 శాతం పెరిగింది. ఏడాది క్రితం రూ. 1 లక్ష పెట్టుబడి పెట్టి ఉంటే ఇప్పుడు ఆ విలువ రూ. 44 లక్షలు అవుతుంది. స్టాక్ స్ప్లిట్ అనంతరం షేరు ధర రూ. 500 నుంచి రూ. 50 స్థాయికి దిగిరానుంది. అయితే, ఈ రోజు స్టాక్ మార్కెట్ ట్రేడింగ్‌లో షేర్లు 5 శాతం నష్టంతో లోయర్ సర్క్యూట్ టచ్ చేశాయి.
కంపెనీ ఎక్స్చేంజ్ ఫైలింగ్ ప్రకారం.. కంపెనీ బోర్డు డైరెక్టర్ల సమావేశంలో 1:10 రేషియోలో స్టాక్ స్ప్లిట్ చేపట్టేందుకు ఆమోదం లభించింది. దీని అర్ధం రూ. 10 ఫేస్ వ్యాల్యూ ఉన్న 1 ఈక్విటీ షేరుని రూ. 1 ఫేస్ వ్యాల్యూ ఉండేలా 10 ఈక్విటీ షేర్లుగా విభజించేందుకు ఆమోదం లభించింది. తాజాగా ఈ స్టాక్ స్ప్లిట్ సంబంధించి అర్హులైన షేర్ హోల్డర్లను నిర్ణయించేందుకు అవసరమైన రికార్డు తేదీని జూన్ 25, 2025 గా కంపెనీ బోర్డు నిర్ణయించించింది.
క్రితం రోజు స్టాక్ మార్కెట్ ట్రేడింగ్ ముగిసే నాటికి ఎలైట్ కాన్ ఇంటర్నేషనల్ లిమిటెడ్ షేరు 5 శాతం నష్టంతో లోయర్ సర్క్యూట్ రూ. 519.85 వద్ద ముగిసింది. ఇవాళ మరో 5 శాతం నష్టంతో మళ్లీ లోయర్ సర్క్యూట్ రూ.499 స్థాయి వద్ద ట్రేడవుతోంది. ఇక ఈ షేరు 52 వారాల గరిష్ఠ ధర రూ. 629.55 వద్ద ఉండగా.. 52 వారాల కనిష్ఠ ధర రూ. 11.02 వద్ద ఉంది.
గత ఏడాది కాలంలో చూసుకుంటే ఈ షేరు ఏకంగా 4381 శాతం లాభాన్ని ఇచ్చింది. అంటే లక్ష రూపాయల పెట్టుబడి ఏడాదిలోనే రూ.44 లక్షలు అవుతుంది. గత ఐదేళ్లలో చూసుకుంటే సంవత్సరాలలో 3594 శాతం లాభాన్ని తమ వాటాదారులకు ఇచ్చింది. లక్ష పెట్టిన వారికి రూ.36 లక్షలు ఇచ్చింది. ప్రస్తుతం ఈ కంపెనీ మార్కెట్ విలువ రూ. 7890 కోట్ల వద్ద ఉంది.
